Thursday, 30 June 2016

ബ്രെക്സിറ്റും ബ്രിട്ടനും - അല്പ സല്പം നിരീക്ഷണങ്ങൾ ... ! / Brexitum Brittanum Alpa Salppam Nireekshanangal ... !

ഇന്ന് ബ്രിട്ടണിലുള്ള ഏതാണ്ട് ഒന്നര ലക്ഷത്തോളമുള്ള മലയാളി വംശജർ മാത്രമല്ല , യു.കെയുടെ ജനസംഖ്യയിൽ മൊത്തമുള്ള  അന്യദേശ വംശീയരായ ഏതാണ്ട് ഇരുപത് ശതമാനത്തോളമുള്ള മറ്റ് വിദേശ വംശീയ ജന വിഭാഗങ്ങളും വളരെ ആകാംഷയോടെ  ഫലം കാത്തിരുന്ന ഒരു ഹിത പരിശോധനയായിരുന്നു ഈ ജൂൺ 23 -ന് ഗ്രേറ്റ് ബ്രിട്ടണിൽ നടന്ന ‘ബെർക്സിസ്റ്റ്  റെഫറണ്ടം‘ ...
ആറരകോടിയോളം ജനസംഖ്യയുള്ള യു.കെ.യിലെ , വെറും കഷ്ടി
കാൽ ശതമാനം  പോലും ഇല്ലാത്ത ഒരു പ്രവാസി ജനതയായ യു.കെ. മലയാളികൾ ‘ബ്രെക്സിറ്റി‘നോട് കാണിച്ച  രാഷ്ട്രീയ പ്രബുദ്ധതയൊന്നും , യു.കെയിൽ ഇന്ന്  മൊത്തത്തിലുള്ള മറ്റ് ജനതയുടെ , കാൽ ഭാഗം പോലും ആളുകളൊന്നും കാഴ്ച്ച വെച്ചില്ല എന്നത് ഒരു വാസ്തവമായ കാര്യമായിരുന്നൂ ...
ആന മുക്കിയില്ലെങ്കിൽ അണ്ണാനെങ്കിലും മുക്കട്ടെ എന്ന് പറഞ്ഞ പോലെ
ഇന്ന് യു കെയിലുള്ള നാലക്ഷരം കുത്തിക്കുറിക്കുവാൻ പ്രാപ്തിയുള്ള ഒട്ടു മിക്ക  മലയാളികളും  ഈ വിഷയത്തെ വിലയിരുത്തി അനേകം അഭിപ്രായ പ്രകാടനങ്ങൾ ഇതിനോടകം വളരെ ചെമ്പായിട്ട് തന്നെ പറഞ്ഞ് കഴിഞ്ഞു ...

ബ്രിട്ടനിലുള്ള പല മലയാളം ‘ഓൺ-ലൈൻ ‘ മാധ്യമങ്ങളിൽ കൂടി കഴിഞ്ഞ ഒരു മാസത്തോളമായി ഈ വിഷയത്തെ ആസ്പമാക്കി  അനുകൂലമായും , പ്രതികൂലമായും 160 ൽ പരം‘ റൌണ്ട് അപ്പ് ബ്രെക്സിറ്റ് പോസ്റ്റു‘കൾ പ്രസിദ്ധീകരിച്ച് യു.കെ മലയാളികൾ മറ്റ് വംശജരെയെല്ലാം ഈ കാര്യത്തിൽ പിന്തള്ളിയതിൽ നമ്മൾ മലയാളികൾക്കൊക്കെ അഭിമാനിക്കാം ... !

ഈ വിഷയത്തോടനുബന്ധിച്ച് ബ്രിട്ടീഷ് മലയാളികൾ 
ബ്രിട്ടനിലങ്ങോളമിങ്ങോളമായി അനേകം  ബ്രെക്സിസ്റ്റ് അവലോകനങ്ങൾ 
നടത്തി ഇതിന്റെ ഗുണദോഷങ്ങളെ  കുറിച്ച് അസ്സലായി വിലയിരുത്തിയിരുന്നു ...

അതായത് അണ്ണാറക്കണ്ണനും തന്നാലയത് എന്ന പോലെ , ഓരൊ
ബ്രിട്ടീഷ് മലയാളിയും അവരുടെ ദൌത്യം നല്ല കിണ്ണങ്കാച്ചിയായി നിർവ്വഹിച്ചു. ..!

എന്നാൽ ഈ ബ്രെക്സിസ്റ്റ് പ്രകാരം ഒരു ഏകീകൃത യൂറോപ്പ് വന്നാൽ
ഹെൽത്ത് സെക്ട്ടറിലും മറ്റും വരുന്ന പുതിയ മാറ്റങ്ങൾ അവരുടെയൊക്കെ
ജോലി , കടുംബ ഭാരം ,  താമസം എന്നിങ്ങനെ പല കാര്യങ്ങൾക്കും പ്രശ്നം നേരിട്ട്  ഉണ്ടാകുമെന്നറിഞ്ഞിട്ടും  ; ഇവിടെയുള്ള മല്ലു സ്ത്രീ രത്നങ്ങളിൽ അധികമാരും  , ഈ
ബ്രെക്സിറ്റിനെ കുറിച്ച് അവരുടേതായ കാഴ്ചപ്പാടുകൾ പങ്കുവെച്ചില്ലാ എന്നത് ഈ അവസരത്തിൽ വല്ലാത്ത  ഒരു വിരോധാഭാസം തന്നെ ..!


എന്തായാലും ദേ പോയ് ദാ വന്നൂന്ന് പറഞ്ഞ പോലെ  കഴിഞ്ഞ
കൊല്ലത്തെ  പൊതു തെരെഞ്ഞെടുപ്പിനും , പിന്നീട്  ഇക്കൊല്ലം ആദ്യമുണ്ടായ ‘മേയർ - കൗൺസിൽ  ഇലക്ഷനു‘കൾക്കും  ശേഷം , ബ്രിട്ടൻ ജനതയുടെ മുമ്പിൽ ചട്പിടുന്നനെ ഒരു വമ്പൻ വേട്ടെടുപ്പ് കൂടി ഈ ജൂൺ 23-ന് തിമർത്താടിയ ശേഷം - ആയതിന്റെ ഫലവും അറിഞ്ഞു കഴിഞ്ഞു ...

ഫലം പുറത്ത് വന്ന ജൂൺ 24 വെള്ളിയാഴ്ച്ച ;  
ചിലർ - ബ്രിട്ടന്റെ സ്വാതന്ത്ര്യ ദിനമായി ആഘോഷിച്ചു ...

മറ്റ് ചിലർ വേറൊരു ‘ബ്ലാക്ക് ഫ്രൈഡെ’യെന്ന് പറഞ്ഞ് ഈ ദിവസം ഒരു കരി ദിനമായി കൊണ്ടാടി ...

ചത്തോടത്ത് നിന്നല്ല നിലവിളി - മറ്റുള്ളോടത്ത് നിന്നാണ് നിലവിളി കേൾക്കുന്നത് എന്ന പോലെ ആഗോള വ്യാപകമായി  തന്നെ പല രാജ്യങ്ങളിലും ഈ ‘ബ്രെക്സിസ്റ്റ് സംഭവ‘ത്തെ പറ്റി പരിതപിക്കുകയും , വളരെയധികം  ചർച്ചകൾ വാതോരാതെ അപ്പപ്പോൾ തന്നെ അരങ്ങേറുകയു  ചെയ്തു ...! ( ബ്രെക്സിറ്റ് ചർച്ച ഏഷ്യാനെറ്റ് ന്യൂസിൽ )



അതായത് ബ്രെക്സിറ്റ് റെഫറണ്ടം അല്ലെങ്കിൽ ബ്രിട്ടൺ യൂറോപ്യൻ യൂണിയൽ
തുടർന്ന് നിൽക്കണമോ അതോ വേണ്ടയോ എന്നാരായുവാൻ  - ബ്രിട്ടീഷ് ജനതയുടെ
ഹിതം പരിശോധിച്ചറിയുവാനുള്ള  ഒരു വേറിട്ട തിരെഞ്ഞെടുപ്പായിരുന്ന് അന്ന് നടന്നത് ...

ജനാധിപത്യത്തിന്റെ  നല്ല കീഴ് വഴക്കങ്ങൾ പിന്തുടരുന്ന ഇത്തരം പൊതുജന ഹിത പരിശോധനകൾ ഇതിന് മുമ്പും ഈ  രാജ്യത്തുണ്ടായതിന്റെ ഫലമായാണല്ലോ 1973-ൽ ‘യൂറോപ്യൻ ഇക്കണൊമിക് കമ്മ്യൂണിറ്റി‘യിൽ  ബ്രിട്ടൻ അംഗമായ ശേഷം ,  ആയത് ശരിയാണൊ അതോ തെറ്റാണൊ എന്നതിന്റെ   ഭാഗമായി ( ആദ്യകാല യൂറൊപ്യൻ യൂണിയന്റെ പ്രതിരൂപം ) പിന്നീട്  1975-ൽ നടന്ന പൊതു ജനങ്ങളുടെ ഹിത പരിശോധനക്ക് ശേഷം , അന്ന് ബ്രിട്ടൻ ഈ സംഘടനയിൽ ഉറച്ച് നിന്നത് ...

പിന്നീട് യൂറോപ്യൻ യൂണിയനിൽ ധാരാളം അംഗ രാജ്യങ്ങൾ കൂടി ചേർന്നപ്പോൾ ഒരു പുതിയ ഉടമ്പടി (മാസ്ചിസ്റ്റ് ട്രീട്ടി ) പ്രകാരം  യൂറോപ്പ് മുഴുവൻ ഒറ്റ കറൻസിയായ ‘യൂറൊ’ 2002 ൽ നിലവിൽ വന്നു .
പക്ഷേ അന്ന് നടന്ന ഇതുപോലുള്ള ഒരു ജന ഹിത പരിശോധനയിൽ 
ബ്രിട്ടൻ ജനത ഒന്നിച്ച് ‘പൌണ്ട്‘  നിലനിറുത്തണമെന്ന് വിധിയെഴുതിയത്
കൊണ്ടാണല്ലോ‍  (ശേഷം ഗോർഡൺ ബ്രൗൺ വെച്ച 7 നിബന്ധനകളും)  ജർമ്മനിയുടെ
 ‘മാർക്കും‘  ഇറ്റാലിയുടെ  ‘ലീറ‘യും . ഫ്രാൻ്സിന്റെ  ‘ഫ്രാങ്കും ‘ ഉൾപ്പെടെ യൂറോപ്യൻ രാജ്യങ്ങളിലെ ഒട്ടുമിക്ക  കറൻസികളും ഇല്ലാതായപ്പോഴും ,  അന്നും ഇന്നും  ‘ബ്രിട്ടീഷ് പൌണ്ട്‘ നില നിന്നതും ആ‍യതിന്റെ വില നാൾക്കുനാൾ ഉയർന്ന് വന്നതും ...


എന്തിന് പറയുവാൻ ഈ അടുത്ത കാലത്ത് ‘സ്കോട്ട്ലാന്റ്‘ , ‘യു .കെ‘ യിൽ നിന്നും വിട്ടു പോകണമെന്ന് മുറവിളി കൂട്ടിയപ്പോൾ   അവിടെ നടന്ന ഇത്തരം ജനകീയ ഹിത പരിശോധന വോട്ടെടുപ്പിലൂടെയാണാല്ലോ ‘സ്കോട്ട്ലാന്റ് ‘ ഇന്നും ‘യു.കെ‘ യിൽ നിലനിൽക്കുന്നത് ...
അതെ
പൊതു ജനങ്ങളുടെ ഭൂരിപക്ഷ അഭിപ്രായം കണക്കി്ലെടുത്തുള്ള പ്രതി വിധികൾ നടപ്പാക്കാനുള്ള ആർജ്ജവം ഇവിടെയുള്ള എല്ലാ രാഷ്ട്രീയ പാർട്ടികളും എന്നും പരിപാലിച്ച് പോരുന്നു ...

പല തരത്തിൽ രാജ്യത്തിന്റെ ഭാവിയെ ബാധിക്കുന്ന എന്തെങ്കിലും
ഇത്തരം പുതിയ വഴിത്തിരിവുകൾ സംജാതമാകുമ്പോൾ ,  തികച്ചും ജനാധിപത്യ
രീതിയിൽ തന്നെ അവരുടെ ഹിതം മനസ്സിലാക്കി മുന്നേറുന്ന ഭരണ രാഷ്ട്രീയ നേതൃത്വം തന്നെയാണ്  ‘യു.കെ‘യിൽ കാലങ്ങളായി നിലവിലുള്ളത് , അല്ലാതെ നമ്മുടെ നാട്ടിലുള്ള
പോലുള്ള ഭൂരിപക്ഷ ഭരണ കക്ഷികൾ  നടത്തുന്ന പോലുള്ള പ്രക്രിയകളല്ല ഇവിടെ നടക്കാറുള്ളത് .
ലോകത്തിലെ  ഏറ്റവും വലിയ ജനാധിപത്യ രാജ്യമായ നമ്മുടെ
നാ‍ട്ടിലെ ഭരണാധിപന്മാർക്കും  ഇത്തരം കീഴ് വഴക്കങ്ങൾ അനുകരിക്കാവുന്നതാണ് ..!

ഒരു പക്ഷേ കഥയറിയാതെ ആട്ടം കണ്ട് വന്നവരുടെ സ്ഥിതിയാണ് കഴിഞ്ഞ ജൂൺ 23 ന് വോട്ട് ചെയ്ത  ഭൂരിഭാഗം യു.കെ നിവാസികളും ഇന്ന് അനുഭവിക്കുന്ന അവസ്ഥാവിശേഷം ...

ഇന്ന് ബ്രിട്ടണിൽ നടമാടീടുന്ന പല പ്രശ്നങ്ങളേയും അനുകൂലമായും ,
പ്രതികൂലമായും ബാധിക്കുന്ന ഒരു വളരെ വലിയ തീരുമാനത്തിനാണ്
ഇവിടത്തെ പൊതുജനങ്ങൾ അന്ന് വിധിയെഴുതിയത് ...!

സ്വന്തം കാര്യങ്ങളും സ്വാർത്ഥ താല്പര്യങ്ങളും മാത്രം സംരംക്ഷിക്കുന്ന ഒരാളെ സംബന്ധിച്ച്
ഇന്നത്തെ അവസ്ഥയിൽ ബ്രിട്ടൻ ‘ഇ.യു ‘വിൽ നിന്ന് വിട്ട് പോരണമെന്ന അഭിപ്രായമാണ് എങ്ങിനെ  നോക്കിയാലും ഉരുതിരിഞ്ഞ് വരിക...
കുറച്ച് കൊല്ലങ്ങളായി ധാരാളം കിഴക്കൻ യൂറോപ്പുകാർ ‘ഇ യു‘ സിദ്ധാന്തമസരിച്ച്
ബ്രിട്ടണിൽ കുടിയേറ്റം  നടത്തി തുടങ്ങിയപ്പോൾ മുതൽ തൊഴിൽ മേഖലകളിലും , മറ്റും
കാലങ്ങളായി ഇംഗ്ലീഷുകാർ കാത്ത് പരിപാലിച്ച്  പോരുന്ന  പല ഔപചാരികതകൾക്കും , ആചാര മര്യാദ്യകൾക്കും (ബ്രിട്ടീഷ് വാല്യൂസ് ) , ട്രാഫിക് മര്യാദ ചിട്ടവട്ടങ്ങൾക്കും കോട്ടം പററി തുടങ്ങിയപ്പോഴാണ്  ഇവിടത്തെ ഒരു വിഭാഗം ആളുകൾ ഇന്നത്തെ ‘ഇ.യു.‘കുടിയേറ്റ നിയമത്തെ എതിർത്ത് തുടങ്ങിയത്...

ഒപ്പം തന്നെ യു.കെയിൽ നിർമ്മിച്ച് വില്പന നടത്തുന്ന പല വസ്തുക്കളും മറ്റ് യൂറോപ്യൻ രാജ്യങ്ങളിൽ  നിന്നും വരുന്ന - അതെ നിലവാരമുള്ള , ചീപ്പായ സാധന സാമഗ്രികളുമായി മത്സരിച്ച് വിപണനം നടത്താൻ  സാധിക്കാതെ , ടി കമ്പനികളും സ്ഥാപനങ്ങളുമൊക്കെ അടച്ചു പൂട്ടേണ്ടി വന്നപ്പോഴാണ് , ഇവിടെ പലർക്കും തൊഴിലുകൾ  നഷ്ടപ്പെട്ടത് .
അതോടൊപ്പം യു.കെ നിവാസികൾക്കൊപ്പം  ‘ബെൻഫിറ്റു‘കളടക്കം പല ആനുകൂല്യങ്ങളും ഈ പുതിയ വരത്തന്മാർക്കും പങ്കുവെക്കേണ്ടി വന്നു ...

ഇത്തരം പല കാര്യങ്ങളും , മറ്റ് സഹായങ്ങളുമായി ബ്രിട്ടൻ ‘ഇ.യു‘വിന്
വേണ്ടി ചിലവഴിക്കുന്ന തുകയുടെ തിരിച്ചു വരവുകൾ  മറ്റ് വ്യാപാര വ്യവസായ
കയറ്റുമതികളും മറ്റുമായി ഈ രാജ്യത്തിന് , ‘ഇ.യു‘ രാജ്യങ്ങളിൽ നിന്നും ഈടാക്കുവാൻ സാധിക്കാതെ  വന്ന സാഹചര്യങ്ങൾ ഉളവായത് കൊണ്ടാണ് ഇപ്പോൾ ബ്രെക്സിറ്റ് തീരുമാനം ഉടലെടുക്കുവാൻ കാരണമെന്ന് പറയുന്നു ...

അതേ സമയം ബ്രിട്ടൻ യൂ‍റോപ്പ്യൻ യൂണിയനിൽ തന്നെ ഉറച്ച് നിൽക്കണമെന്ന്
വാദിക്കുന്ന മറുപക്ഷം  നോക്കുകയാണെങ്കിൽ  ഇവിടെയുള്ള  വൻകിട കച്ചവടക്കാർക്കും ,
ഉന്നത വ്യവസായികൾക്കും ,  സൂപ്പർ പവ്വർ അധികാരം മോഹിക്കുന്ന രാഷ്ട്രീയക്കാർക്കുമൊക്കെ അവർക്കും  - അവരുടെ  നാടിനും ; ഭാവിയിൽ സാമ്പത്തികമായും , സുരക്ഷാ പരമായും നല്ല കെട്ടുറപ്പ് നൽകുന്ന ഈ ‘ഇ.യു.അംഗത്വം  ( രണ്ട് മിനിട്ട് വീഡിയോ ) തുടരണമെന്ന് തന്നെയാണ്  ആഗ്രഹം ...

യൂറോപ്പ് ഒരു സൂപ്പർ പവ്വർ ആയി മാറിയാൽ മറ്റിതര രാജ്യങ്ങളെയെല്ലാം തങ്ങളുടെ  കാൽക്കീഴിൽ  ആക്കാം എന്നുള്ള ഒരു വ്യാമോഹവും ഇവരുടെയൊക്കെ ഉള്ളിൽ ഒളിഞ്ഞിരിക്കുന്നുണ്ടായിരുന്നു ...

ഒരു പക്ഷേ കാലക്രമേണ ‘യൂറൊ‘ പൗണ്ടിനേക്കാൾ  മൂല്യം നേടിയാൽ 
അന്നൊന്നും അത്ര പെട്ടെന്ന് ‘ഇ.യു‘ വുമായി   ബ്രിട്ടന് മത്സരിക്കാൻ പറ്റില്ല എന്നർത്ഥം ...

ഐക്യമതം മഹാബലം എന്ന് പഞ്ഞത് പോലെയാണ് ആയതിന്റെ ഗുണം.
അതായത് ഒരു രാജ്യം ഒറ്റക്ക് നിന്ന് ഏത് സംഗതികളേയും അഭിമുഖീകരിക്കുന്നതിനേക്കാൾ
മെച്ചമായിരിക്കുമല്ലൊ ; തനി ഒറ്റ  കെട്ടായ ഒരു ഏകീകൃത യൂറോപ്പിൽ നിന്ന്  - 28 അംഗരാജ്യങ്ങളുള്ള ‘ഇ.യു‘ എന്ന പേരിൽ നേരിടുമ്പോൾ  ഉണ്ടാകുന്ന ശക്തിയും , ബലവും പിന്നീടുണ്ടാകുന്ന ഗുണമേന്മയുമൊക്കെ ..അല്ലേ

ഈ ഹിത പരിശോധന തെരെഞ്ഞെടുപ്പ് കഴിഞ്ഞപ്പോൾ
പകുതിയിലേറെയുള്ള വോട്ടർമാർ വിധിയെഴുതിയത് ബ്രിട്ടൻ
യൂറോപ്പ്യൻ യൂണിയനിൽ നിന്നും പുറത്ത് പോരണമെന്നായിരുന്നു ... !

‘പുറത്താകലുകൾ’ ഒരു നല്ല ഒരു സംഗതിയെ സ്വീകരിക്കുവാനുള്ള മുന്നോടിയാണെന്ന് കരുതിയാണ് , അല്പ ഭൂരിപക്ഷത്തോടെ അനുകൂലമായി വോട്ട് ചെയ്ത് ഇതിനെ വിജയിപ്പിച്ച പൊതു ജനം പറയുന്ന വസ്തുത ...

എന്നാൽ മറുപക്ഷം പറയുന്നത് ‘പുറത്താകാതി‘രിക്കുന്നതാണ്
ഭാവിയിൽ ഒരു നല്ല ബ്രിട്ടനെ വാർത്തെടുക്കുവാൻ സഹായിക്കുക എന്നതാണ് ...
ബ്രിട്ടൺ യൂറോപ്പ്യൻ യൂ‍ണിയനിൽ നിന്നും പുറത്തായപ്പോൾ സന്തോഷിച്ച ഏവരും
ബ്രിട്ടൺ ‘യൂ‍റോ കപ്പ് ഫുഡ്ബോൾ ‘ മത്സരത്തിൽ നിന്നും പുറത്തായപ്പോൾ കരഞ്ഞപോലെ 
കാലം അവരെ വീണ്ടും കരയിപ്പിക്കുക തന്നെ ചെയ്യും എന്നാണ് ഈ മറുപക്ഷക്കാർ ഇപ്പോഴും ആണയിട്ട് പറയുന്നത് ...!
ബ്രിട്ടണിലെ ഭരണപക്ഷത്തും , പ്രതിപക്ഷത്തുമുള്ള ഒരേ പാർട്ടിക്കാരായ
രാഷ്ട്രീയ നേതാക്കൾ വരെ , ബ്രെക്സിറ്റിനെ അനുകൂലിച്ചും പ്രതികൂലിച്ചും അവരുടെ
നയം പോലെ തികച്ചും വ്യക്തി പരമായി തന്നെ , ഇരു പക്ഷത്തും ഉറച്ച് നിന്ന് ഡിബേറ്റുകളിൽ പങ്കെടുത്തവരാണ്.

ഭരണ പക്ഷത്തിലെ ഒരു വിഭാഗം രാജ്യം യൂറോപ്പിൽ നിന്നും സ്വതന്ത്രമായി ഒറ്റപ്പെട്ട് നിൽക്കണമെന്ന് വാദിച്ചപ്പോൾ പ്രധാന മന്ത്രി കാമറൂണടക്കം പലരും യൂണിയനിൽ തന്നെ തുടർന്ന് നിൽക്കണമെന്ന് ഉറച്ച് വിശ്വസിച്ചവരാണ് ...

വോട്ടെടുപ്പിന് ശേഷം പൊതു ജനം നേരിയ ഭൂരിപക്ഷത്തിനാണെങ്കിലും ഇ.യുവിൽ നിന്നും പുറത്ത് വരാൻ  ഹിതം രേഖപ്പെടുത്തിയപ്പോൾ , പ്രധാനമന്ത്രിയായ കാമറൂൺ ജനഹിതം മാനിച്ച് സ്വയം രാജിവെച്ച് , തന്റെ സ്ഥാനം ഒഴിഞ്ഞു ... !
കാമറൂൺ ജനാധിപത്യ രാജ്യങ്ങളിലെ നേതാക്കൾക്ക്  തികച്ചും ഒരു വേറിട്ട മാതൃകയായി മാറിയിരിക്കുന്നു ...!

തന്റേതല്ലാത്ത പിഴവുകളായിട്ടു  പോലും സ്വന്തം പാർട്ടിയിലെ എല്ലാ  ‘എം.പി‘ 
മാരും ഒറ്റക്കെട്ടായി വീണ്ടും സപ്പോർട്ട് നല്കി പിന്നിലുണ്ടായിട്ടും , ഇദ്ദേഹം ജന ഹിതം 
മാനിച്ച് , ലോകപ്പെരുമയുള്ള തന്റെ സിംഹാസനം സ്വയം ഒഴിഞ്ഞ് പോയിരിക്കുകയാണ്...

അഴിമതിയും, അംഗരക്ഷകരും  ഇല്ലാതിരുന്ന , പൊതുജനങ്ങളോടൊപ്പം  പബ്ലിക് ട്രാൻസ്പോർട്ടിൽ പോലും സഞ്ചരിച്ചിരുന്ന ,  കുടുംബസ്ഥനായ , സ്വന്തം നാടിന്റെ ഉന്നമനത്തിനും , ഒപ്പം ചുറ്റുമുള്ള പാവപ്പെട്ട രാജ്യങ്ങളുടെ ഉയർച്ചക്കും മുന്നിട്ടിറങ്ങിയതിന്റെ കൂലിയാണ് ഈ വിടവാങ്ങൽ ...
അങ്ങിനെ ആഗോള വ്യാപകമായി പലരാലും മാനിക്കപ്പെട്ട  
ഒരുവനായി മാറി കാമറൂൺ  ...!   ( വീഡിയോ ) .

അതേ സമയം ബ്രെക്സിറ്റ് ഹിത ഫലം അറിഞ്ഞ ശേഷം , ബ്രിട്ടൻ
യൂറോപ്പ്യൻ യൂണിയനിൽ തുടർന്നില്ലെങ്കിൽ രാജ്യം പിന്നീട് തകർന്ന് തരിപ്പണമായി
പോകുമെന്ന് പറഞ്ഞ് പതിനായിരങ്ങൾ തെരുവിലിറങ്ങി പ്രതിക്ഷേധ റാലികൾ  നടത്തിയും , മറ്റിടങ്ങളിൽ അനുകൂലികളാൽ ഒറ്റപ്പെട്ട അല്പസല്പം വംശീയ അധിക്ഷേപങ്ങളും അരങ്ങേറുകയുണ്ടായി...
ഇനി എന്തൊക്കെ സംഗതികളാണ് ഉണ്ടാകുവാൻ
പോകുന്നതെന്ന് കാത്തിരുന്ന്  തന്നെ കാണണം ... !


ഇനി ഈ ബ്രെക്സിറ്റിന്റെ ഗുണ ദോഷ ഫലങ്ങൾ കുറച്ചൊക്കെ മനസ്സിലാക്കണമെങ്കിൽ വീണ്ടും  കുറച്ച് കാലാങ്ങൾ കൂടി കാത്തിരിക്കേണ്ടി
വരും . 
മറ്റ് യൂ‍റോപ്പ്യൻസ് ഇനി മേൽ ഇപ്പോഴുള്ള പോലെ വിസയൊന്നുമില്ലാതെ
വരാതായാൽ , ബ്രിട്ടണിൽ പല തൊഴിൽ മേഖലകളിലും പ്രതിസന്ധിയുണ്ടാകുകയാണെങ്കിൽ ഭാവിയിൽ ഇന്ത്യക്കാരടക്കം , പല ഏഷ്യക്കാർക്കും വീണ്ടും ഇവിടെയുള്ള ജോലികൾക്ക് ‘വർക്ക് പെർമിറ്റു‘കൾ ലഭിക്കുവാൻ സാധ്യതയുണ്ടന്ന് പറയുന്നു...


എന്തൊക്കെയായാലും ഇനി  അടുത്ത രണ്ട് കൊല്ലത്തിനുള്ളിൽ
‘ഇ.യു‘വും ബ്രിട്ടനും തമ്മിൽ ഇനി ഉണ്ടാക്കുവാൻ പോകുന്ന 
നിയമ ഭേദഗതികളുടെ അടിസ്ഥാനത്തിലായിരിക്കും സ്വതന്ത്രമാക്കപ്പെടുന്ന പുതിയ ഗ്രേറ്റ് ബ്രിട്ടന്റെ ഭാവിയിലെ വളർച്ചകളും  , തളർച്ചകളും ശരിക്കും തിരിച്ചറിയുവാൻ സാധിക്കുക...

അപ്പോഴും ബ്രിട്ടനോടൊപ്പമുള്ള എല്ലാ കോമൺവെൽത്ത് രാജ്യങ്ങളും ഈ അമ്മ രാജ്യത്തിനൊപ്പം നിൽക്കുമെന്ന് നമുക്ക് ഏവർക്കും ആശ്വസിക്കാം അല്ലെ.

സംഭവാമി യുഗേ യുഗേ ...

ഇതുവരെ സംഭവിച്ചതും ഇപ്പോള്‍ സംഭവിക്കുന്നതും
ഇനി സംഭവിക്കാനുള്ളതുമെല്ലാം  നല്ലതിന് തന്നെയാവട്ടെ ...



പിന്മൊഴി :-  
ഈ ബ്രെക്സിറ്റ് നിരീക്ഷണങ്ങൾക്ക്  
ലേഖനങ്ങളോടും മറ്റ്  പല ബ്രിട്ടീഷ് മാധ്യമങ്ങളോടും കടപ്പാട് ..

20 comments:

Muralee Mukundan , ബിലാത്തിപട്ടണം said...

ബ്രിട്ടനിൽ ദേശീയമായി മാത്രമല്ല
അന്തർദ്ദേശീയമായി തന്നെ വളരെയധികം
ചർച്ച ചെയ്യപ്പെട്ട ഒരു വിഷയമായിരുന്നു ബ്രെക്സിസ്റ്റ്
റെഫറണ്ടം.
ബ്രെക്സിറ്റ് റെഫറണ്ടം എന്തെന്ന് വെച്ചാൽ , ഇനി ബ്രിട്ടൺ
യൂറോപ്യൻ യൂണിയനിൽ തുടർന്ന് നിൽക്കണമോ അതോ വേണ്ടയോ
എന്നാരായുവാൻ - ബ്രിട്ടീഷ് ജനതയുടെ ഹിതം പരിശോധിച്ചറിയുവാനുള്ള
ഒരു വേറിട്ട ഹിത പരിശോധന തിരെഞ്ഞെടുപ്പായിരുന്നു ഈ കഴിഞ്ഞ ജൂൺ 23 ന്
ഇവിടെ അന്ന് നടന്നത് ...
ഇതിനെ കുറിച്ചെല്ലാം കണ്ടും കേട്ടും ബ്രിട്ടനിലുണ്ടായിട്ട് പോലും
ബ്രെക്സിറ്റിനെ കുറിച്ച് ഒന്നും ഈ ‘ബിലാത്തി പട്ടണത്തി‘ൽ എഴുതിയിടാത്തത്
എന്താണെന്ന് പല ബൂലോക മിത്രങ്ങളും ആരാഞ്ഞത് കൊണ്ട് മാത്രമാണ് , ബ്രെക്സിറ്റിനെ
പറ്റി അല്പ സല്പം നിരീക്ഷണങ്ങൾ ഇവിടെ കുറിച്ചിടുന്നത് കേട്ടൊ കൂട്ടരെ

vettam said...

ഈ തീരുമാനം ബ്രിട്ടനെ കരയിക്കുക തന്നെ ചെയ്യും .പഠിക്കാതെ ഉഴപ്പന്മാരായി നടക്കുന്ന വീരന്മാര്‍ക്കു തൊഴില്‍ ലഭിക്കാനല്ല ,നഷ്ടപ്പെടാനാണ് കൂടുതല്‍ ചാന്‍സ് .അവിടെ കുടിയേറിയിട്ടുള്ള മറ്റുള്ളവരെയും ബ്രെക്സിസ്റ്റ് ദോഷകരമായി ബാധിക്കും.

പട്ടേപ്പാടം റാംജി said...

വളരെ വിശദമായി തന്നെ അവതരിപ്പിച്ചിരിക്കുന്നു.

Mubi said...

മുരളിയേട്ടന്‍റെ പോസ്റ്റ്‌ വായിച്ചപ്പോഴാണ് എനിക്ക് കാര്യങ്ങളൊക്കെ ഒരു വകക്ക് തിരിഞ്ഞത്. റിപ്പോര്‍ട്ട്‌ ചെയ്യപ്പെടുന്ന വംശീയ അതിക്രമങ്ങള്‍ ഒറ്റപ്പെട്ട സംഭവങ്ങള്‍ മാത്രമായിരിക്കുമല്ലേ? കാത്തിരുന്നു കാണാം... എല്ലാം നല്ലതിനാകട്ടെ.

കൊച്ചു ഗോവിന്ദൻ said...

ബ്രെക്സിറ്റിനെ കുറിച്ച് അവിടുന്നും ഇവിടുന്നും ഒക്കെ കുറച്ച് ലേഖനങ്ങൾ വായിച്ചിരുന്നെങ്കിലും ഇപ്പോഴാണ് സംഗതി വെടിപ്പായിട്ട് മനസിലായത്. നന്ദി മുരളിയേട്ടാ.

Cv Thankappan said...

ബ്രിട്ടനിലെ പ്രശനങ്ങളെപ്പറ്റി ഏതാണ്ട് വാലും,തുമ്പുമൊക്കെ ഗ്രാഹ്യമുള്ള എന്നെപ്പോലുള്ളവര്‍ക്ക് ഈ വിവരണം അറിവേകാന്‍ ഉപകാരപ്രദമായി.
ആശംസകള്‍

ഷിറാസ് വാടാനപ്പള്ളി said...

Visadamayi vayikkan patti. AAsamsakal

വീകെ said...

ബ്രെക്സിറ്റിന്റെ വാലും തുമ്പും ഇപ്പഴാ ഒന്നു തിരിഞ്ഞത്. എന്താണ് ബിലാത്തിച്ചേട്ടൻ ഇത്രയും വലിയൊരു മഹാമേള നടന്നിട്ടും മിണ്ടാതിരിക്കുന്നതെന്ന് ചിന്തിക്കുകയായിരുന്നു.
ആശംസകൾ ......

വീകെ said...

ബ്രെക്സിറ്റിന്റെ വാലും തുമ്പും ഇപ്പഴാ ഒന്നു തിരിഞ്ഞത്. എന്താണ് ബിലാത്തിച്ചേട്ടൻ ഇത്രയും വലിയൊരു മഹാമേള നടന്നിട്ടും മിണ്ടാതിരിക്കുന്നതെന്ന് ചിന്തിക്കുകയായിരുന്നു.
ആശംസകൾ ......

ബൈജു മണിയങ്കാല said...

കേരളവും ആഗോള ഗ്രാമം ആയിട്ടില്ല എങ്കിലും
മലയാളി ഒരാഗോള പൗരനാണ്
മോദി ബ്രിട്ടൻ സന്ദർശിച്ചപ്പോൾ മോദി തിരിച്ചു പോകണം എന്നു മലയാളത്തിൽ പ്രത്യക്ഷപ്പെട്ട പോസ്റ്റർ പോലും അതിനു ഉദാഹരണം മാത്രം
ബ്രെക്സിറ്റ്‌ പക്ഷെ എത്രത്തോളം ശരിയായ തീരുമാനം ആണെന്ന് അറിയില്ല
ലോകം കൂടുതൽ കൂടുതൽ ഒരുമിക്കുന്ന കാലത്തു
ബ്രിട്ടന്റെ പുറത്തു പോക്ക് ട്രംപിനെ പോലെ ഒരാൾ അമേരിക്കയിൽ കുരുത്താർജിച്ചു വരുന്നത് ആഗോള വലതു തീവ്രപക്ഷ വളർച്ച എല്ലാം മലയാളിയെയും കേരളത്തെയും എത്ര ബാധിക്കുന്നു എന്നു നിരീക്ഷിച്ചാൽ ലോകത്തു അതിന്റെ വ്യാപ്തി എത്ര വലുതായിരിക്കും എന്നു കണ്ടെത്താം എന്നു തോന്നുന്നു
നന്നായി മുരളി ഭായ് ഈ നിരീക്ഷണം

Lazar Dsilva said...

informative...

Geetha Omanakuttan said...

ഞാനും ന്യൂസ് ഒക്കെ ഒന്നോടിച്ചു വായിക്കുമ്പം ഇത്തിരി അറ്റവും, തുമ്പുമൊക്കെയേ പിടികിട്ടൂ. മുരളിസാറിന്റെ ഓരോ പോസ്റ്റും ഇതുപോലെ വിജ്ഞാനപ്രദമായ എന്തെങ്കിലും വിവരങ്ങൾ ആവുംന്നുറപ്പുണ്ട് . അതിനാൽ കഴിവതും വായനക്ക് വരാൻ ശ്രമിക്കാറുണ്ട്. ഇത്തരം ലോകവിവരങ്ങൾ
പങ്കുവച്ചതിൽ നന്ദി സർ.

Muralee Mukundan , ബിലാത്തിപട്ടണം said...

പ്രിയപ്പെട്ട ജോർജ്ജ് സാർ, നന്ദി.ഈ തീരുമാനം ബ്രിട്ടനെ കരയിപ്പിക്കുകയൊ ചിലപ്പോൾ കര കയറ്റുകയോ ചെയ്യും എന്നു തന്നെയുള്ള രണ്ടഭിപ്രായത്തിൽ തന്നെയാണ് ഇവിടത്തെ പൊതുജനം ഇപ്പോഴും. പണത്തിന്റെ ആലസ്യത്താൽ പഠിക്കാതെ പണിയെടുക്കാതെ ഉഴപ്പന്മാരായി നടക്കുന്ന പല പൊതുജനങ്ങൾക്കും ബ്രെക്സിറ്റിന്റെ വരും വരായ്കകൾ ഇപ്പോഴും എന്താണെന്ന് ശരിക്കറിയില്ല കേട്ടൊ ഭായ് .

പ്രിയമുള്ള റാംജി ഭായ്, നന്ദി. വളരെ വിശദമായി തന്നെ ഈ വിഷയത്തെ കുറിച്ചറിയണമെങ്കിൽ ഒരു പാടൊരുപാട് സംഗതികളുണ്ട് , ഇത് അവിടന്നും ഇവിടന്നും നുള്ളി പറുക്കിയെടുത്തതാണ് കേട്ടൊ ഭായ് .

പ്രിയപ്പെട്ട മുബി, നന്ദി.ബ്രെക്സിറ്റ് കാരണം ഇനി ഇവിടെയെന്താണ് ഉണ്ടാകുന്നതെന്ന് കണ്ടറിയണം. ബ്രിട്ടന് ഭാവിയിൽ സാമ്പത്തികമായി കോട്ടമുട്ടായാൽ മലയാളികൾ ആസ്ത്രേലിയയിലേക്കോ , കാനഡയിലേക്കോ കുടിയേറണമെന്ന് പറഞ്ഞിരിക്കുകയാണീപ്പോൾ കേട്ടൊ മുബി.

പ്രിയമുള്ള കൊച്ചു ഗോവിന്ദാ ,നന്ദി.ബ്രെക്സിറ്റിനെ കുറിച്ച് അവിടുന്നും ഇവിടുന്നും കണ്ടും കേട്ടുമൊക്കെയാണ് ഞാനും ഈ ലേഖനം കാച്ചി കുറുക്കിയെടുത്തത് . ഈ സംഗതിയെ കുറിച്ച് ഇവിടെയുള്ളവർക്കു പോലും ഇപ്പോഴും വെടിപ്പായിട്ട് മനസിലായില്ല എന്നതാണ് സത്യം കേട്ടൊ ഭായ് .

പ്രിയപ്പെട്ട തങ്കപ്പൻ സാർ, നന്ദി.പ്രവാസികളായ നമ്മൾക്ക് നേരിട്ട് പ്രശ്നങ്ങൾ നേരിടുമ്പോഴാണല്ലോ നാമും അതിനെ കുറിച്ചൊക്കെ വിശദമായി അന്വേഷിക്കുന്നത് .അങ്ങിനെ കിട്ടിയ ഏതാണ്ട് വാലും,തുമ്പുമൊക്കെ ചേർത്ത് ഉണ്ടാക്കിയതാണ് ഈ ബ്രെക്സിറ്റ് അവലോകനം കേട്ടൊ ഭായ്.

പ്രിയമുള്ള ഷിറാസ് ഭായ്, നന്ദി.ഈ വിശദമായ വായനക്ക് ഒത്തിരി സന്തോഷമുണ്ട് കേട്ടൊ ഭായ്.

ആറങ്ങോട്ടുകര മുഹമ്മദ്‌ said...
This comment has been removed by the author.
ആറങ്ങോട്ടുകര മുഹമ്മദ്‌ said...

കാലികപ്രസകതവും വിജ്ഞാനപ്രദവും..ന്യായമായ നിഗമനങ്ങളും

സുധി അറയ്ക്കൽ said...

മുരളിയേട്ടൻ ഈ പോസ്റ്റ്‌ ഇട്ടില്ലെങ്കിലേ അതിശയമുള്ളൂ.ബ്രെക്സിറ്റ്‌ ബ്രെക്സിറ്റ്‌ എന്ന് കേൾക്കാൻ തുടങ്ങിയിട്ട്‌ എത്ര നാളായി.വിശദമായി പറഞ്ഞത്‌ വിശദമായിത്തന്നെ വായിച്ചു.ബ്രിട്ടനു നാശത്തിന്റെ ബ്രെക്സിറ്റ്‌ ആകൈല്ലായെന്ന് പ്രത്യാശിയ്ക്കാം.

വിനുവേട്ടന്‍ said...

കലക്കൻ ലേഖനം മുരളിഭായ്‌...

Muralee Mukundan , ബിലാത്തിപട്ടണം said...
This comment has been removed by the author.
Anonymous said...

പല തരത്തിൽ രാജ്യത്തിന്റെ ഭാവിയെ ബാധിക്കുന്ന എന്തെങ്കിലും
ഇത്തരം പുതിയ വഴിത്തിരിവുകൾ സംജാതമാകുമ്പോൾ , തികച്ചും ജനാധിപത്യ
രീതിയിൽ തന്നെ അവരുടെ ഹിതം മനസ്സിലാക്കി മുന്നേറുന്ന ഭരണ രാഷ്ട്രീയ നേതൃത്വം തന്നെയാണ് ‘യു.കെ‘യിൽ കാലങ്ങളായി നിലവിലുള്ളത് , അല്ലാതെ നമ്മുടെ നാട്ടിലുള്ള
പോലുള്ള ഭൂരിപക്ഷ ഭരണ കക്ഷികൾ നടത്തുന്ന പോലുള്ള പ്രക്രിയകളല്ല ഇവിടെ നടക്കാറുള്ളത് .
ലോകത്തിലെ ഏറ്റവും വലിയ ജനാധിപത്യ രാജ്യമായ നമ്മുടെ
നാ‍ട്ടിലെ ഭരണാധിപന്മാർക്കും ഇത്തരം കീഴ് വഴക്കങ്ങൾ അനുകരിക്കാവുന്നതാണ് ..!

By
K.P.Raghulal

SAYUJ K R said...

എന്നാൽ ഈ ബ്രെക്സിസ്റ്റ് പ്രകാരം ഒരു ഏകീകൃത യൂറോപ്പ് വന്നാൽ
ഹെൽത്ത് സെക്ട്ടറിലും മറ്റും വരുന്ന പുതിയ മാറ്റങ്ങൾ അവരുടെയൊക്കെ
ജോലി , കടുംബ ഭാരം , താമസം എന്നിങ്ങനെ പല കാര്യങ്ങൾക്കും പ്രശ്നം നേരിട്ട് ഉണ്ടാകുമെന്നറിഞ്ഞിട്ടും ; ഇവിടെയുള്ള മല്ലു സ്ത്രീ രത്നങ്ങളിൽ അധികമാരും , ഈ
ബ്രെക്സിറ്റിനെ കുറിച്ച് അവരുടേതായ കാഴ്ചപ്പാടുകൾ പങ്കുവെച്ചില്ലാ എന്നത് ഈ അവസരത്തിൽ വല്ലാത്ത ഒരു വിരോധാഭാസം തന്നെ ..!