Monday, 31 December 2012

ഉണ്ടയ് ഉണ്ടയ് ഏഴ് - ഫിഫ്റ്റി - സ്റ്റിൽ നോട്ട് ഔട്ട് ... ! 007 - Fifty - Still Not Out ... !

 ലണ്ടനിൽ താമസിച്ചുകൊണ്ടിരിക്കുന്ന ഒരു ബൂലോഗനെന്ന നിലക്ക് , ഭൂലോകം മുഴുവൻ പെരുമയുള്ള ഈ ചേട്ടായിയുടെ അമ്പതാം പിറന്നാളോഘാഷവേളയെ കുറിച്ച് പറഞ്ഞില്ലെങ്കിൽ എനിക്ക് തന്നെ വല്ലാത്ത ഒരു നാണക്കേടുള്ളതുകൊണ്ടാണ് കൊല്ലാവസാനത്തിന് മുമ്പ് ഇതിനെ കുറിച്ചും രണ്ട് വാക്കുകൾ ഈ ബിലാത്തിപട്ടണത്തിൽ ;  കോറിയിടാമെന്ന് കരുതിയാണ്  ഇവിടെ വന്നിപ്പോൾ ഇരിക്കുന്നത് ...

ബ്രിട്ടനിലെ രാജ്ഞിയുടെ - ഭരണത്തിന്റെ രജതജൂബിലിയാഘോഷങ്ങൾക്കും , 
കായിക മാ‍മാങ്കങ്ങളായ ‘ലണ്ടൻ 2012  ഒളിമ്പിക്സ് / പാരാളിമ്പിക്സ് സെർമണി‘യാഘോഷങ്ങൾക്കും ഒപ്പം തന്നെ ലണ്ടനിൽ ഇക്കൊല്ലം കൊണ്ടാടിയ ഒരു വമ്പിച്ച ആഘോഷം തന്നെയായിരുന്നു ഈ പ്രദർശനോത്സവത്തിലും അരങ്ങേറിയിരുന്നത് ...!

ഈ ഗെഡിയുടെ കഴിഞ്ഞ 50 കൊല്ലമായി നടമാടിയിരുന്ന 
ലീലാവിലാസങ്ങളേയും , അതിനോടനുബന്ധിച്ച സംഗതികളെയുമൊക്കെ 
ചേർത്തുള്ള  സുവർണ്ണ ജൂബിലി ആഘോഷങ്ങളും , രണ്ടുമാസത്തോളം  നീണ്ടുനിന്ന 
ഒരു ‘ഇന്റെർ-നാഷ്ണൽ എക്സിബിഷ‘നും കൊട്ടിഘോഷിച്ചാണ്  അന്നീ ലണ്ടനിൽ കൊണ്ടാടിയത്..!

ഒളിമ്പിക് തിരക്കിന്റെ ഇടവേളകളിൽ 
കിട്ടിയ ഒരു ഓഫ് ദിനത്തിന് , വൊളണ്ടിയറായി 
എത്തിയ ഒരു സ്കോട്ടിഷ് കൂട്ടുകാരിയോടൊപ്പമാണ് 
കെട്ടുകാഴ്ച്ചകളെല്ലാം കാണാൻ പോയത്..

ഒരു കമ്പനിയിൽ ഇപ്പോൾ വർക്ക് ചെയ്ത് കൊണ്ടിരിക്കുന്നവരും , കഴിഞ്ഞ 50 കൊല്ലമായി  പ്രവർത്തിച്ചിരുന്നവരും, റിട്ടയർ ചെയ്തവരുമൊക്കെ ഒത്ത് കൂടിയിട്ട് ... അവരെല്ലാവരും കൂടി പടച്ചുവിട്ട പ്രൊഡക്റ്റ്സിനെ കുറിച്ച് വിലയിരുത്തുകയും , അവയുടെയൊക്കെ ഉന്നത വിജയങ്ങളെ വാഴ്ത്തുകയും, ഓരൊ പ്രൊഡക്ഷൻ കാലഘട്ടങ്ങളിലുണ്ടായ അനുഭവങ്ങളും , പാളിച്ചകളുമൊക്കെ പങ്കുവെച്ച അമ്പത്  ദിനരാത്രങ്ങളിൽ ... 
ഏതൊരുവനും മുങ്കൂട്ടി ടിക്കറ്റെടുത്തിട്ടുണ്ടെങ്കിൽ കാണികളായി   
ആ വേദികളിലൊക്കെ കേട്ടും , കണ്ടും , ഉണ്ടും, ഉറങ്ങിയും പങ്കെടുക്കാവുന്ന 
പരിപാടികളായിരുന്നു അന്നവിടെയൊക്കെ അരങ്ങേറികൊണ്ടിരുന്നത് ..

നിങ്ങളൊക്കെ കരുതുന്നുണ്ടാകും 
എന്തിനാണ് വെറുമൊരു  ഗോൾഡൻ 
ജൂബിലി കൊണ്ടാടുന്ന ഒരുവനെ കുറിച്ച് 
ഇത്രയേറെ വാഴ്ത്തിപ്പറയുവാനുള്ള വകകളാണ് ,  
അഥവാ എന്ത് ബന്ധമാണ് ; ഇതിനൊക്കെ ഞാനുമായിട്ടുള്ളതെന്ന്..?

ഞങ്ങൾ തമ്മിൽ ഉള്ള ഒരേയൊരു കണക് ഷൻ ...
ഞങ്ങളുടെ രണ്ട് പേരുടേയും ജോലികകൾ ഒന്നാണെന്നുള്ളതാണ്..

വെറും ചാരപ്പണി ...!

മൂപ്പരാണെങ്കിൽ M - 16  ലെ സാക്ഷാലൊരു ബ്രിട്ടീഷ് ചാരനും ,

ഇമ്മളാണെങ്കിൽ ഇവിടത്തെ ഒരു ലോക്കൽ ചാരനുമെന്ന വത്യാസം മാത്രം.. !

ഇദ്ദേഹം പിറന്ന 1962 മുതൽ  
ഇക്കൊല്ലം 2012 വരെ ലോകം മുഴുവൻ 
സഞ്ചാരം നടത്തി , കഴിഞ്ഞ അഞ്ച് പതിറ്റാണ്ടുകളായി 
ഇഹലോക  ജനതയെ മുഴുവൻ കീഴടക്കിക്കൊണ്ടിരിക്കുകയായിരുന്നൂ...!

അതെ ചാരന്മാരുടെ തലതൊട്ടപ്പനായ 
ബിലാത്തിക്കാർ,  ‘നോട്ട് നോട്ട്  സെവനെ‘ന്ന് 
അഥവാ ‘ ഡബ്ലോസെവൻ‘ എന്ന് , ഓമനപ്പേരിട്ട് വിളിക്കുന്ന 
ബ്രിട്ടീഷ് ചാര സംഘടനയായ എം.16 നിലെ ഏജന്റ് , നമ്പർ ,
‘സീറോ സീറോ സെവൻ‘ ആയ സാക്ഷാൽ ‘ജെയിംസ് ബോണ്ട്‘ ...!

ജെയിംസ് ബോണ്ട് പ്രൊഡക് ഷൻ കമ്പനിയായ  Eon -നും , ബാർബിക്കനും 
കൈകോർത്ത് സംഘടിപ്പിച്ച  2012 ജൂലായ് 6 മുതൽ സെപ്തംബർ 5 വരെ നീണ്ടുനിന്ന 
ഈ  എക്സിബിഷനിലൂടെ ... 
ഈ കമ്പനിയിൽ നിന്നും പലപ്പോഴായി പുറത്ത് വന്ന് , ലോകം 
മുഴുവൻ വെട്ടിപ്പിടിച്ചിരുന്ന,  അതാത് കാലഘട്ടങ്ങളിലെ ഉന്നത നിലവാരം 
പുലർത്തി പോന്നിരുന്ന ആ പ്രൊഡക്സിന്റെ പ്രദർശനങ്ങളും , അവയൊക്കെ 
ഉണ്ടാക്കുവാൻ ഉപയോഗിച്ചിരുന്ന സ്പെഷലായ സാധന സാമാഗ്രികളുടെ കാഴ്ച്ചവട്ടങ്ങളുമൊക്കെയായി നമ്മുടെയൊക്കെ കണ്ണ് ബൾബാക്കി തീർത്ത മനോഹരമായ കാഴ്ച്ചകൾ ...!

രണ്ടാം വട്ടം...
ഞാനീയെക്സിബിഷൻ സന്ദർശിക്കുവാൻ പോയത് ഒളിമ്പിക് ഡൂട്ടിക്കിടയിലായിരുന്നൂ...                  കൂടെ നാട്ടിൽ നിന്നും സന്നദ്ധ-സേവനം അനുഷ്ട്ടിക്കുവാൻ വന്ന ഒരു കണ്മണിയോടൊപ്പവും..                                 പക്ഷേ അന്നവിടെയുണ്ടായിരുന്ന ‘റോജർ മൂറിനൊപ്പവും‘ , ‘ഡാനിയെൽ ക്രെയിഗി‘നൊപ്പവും ഫോട്ടോയെടുക്കുന്നതിന് 20 പൌണ്ട് അടച്ച് രശീത് എടുത്ത് , എന്റെ കൂടെ വന്ന അതിഥി , നാട്ടിൽ നിന്നും എയർ ഹോസ്റ്റസ്സായി വിരമിച്ചവൾ , അവളുടെ ക്യാമറയിൽ എടുത്ത ഫോട്ടൊകളൊന്നും , ഇതുവരെയും മെയിലിൽ കൂടി ആ സുന്ദരിക്കോത  അയച്ച് തരാതെ എന്നെ പറ്റിച്ചുകൊണ്ടിരിക്കുകയാണ്.ഇപ്പോഴും...!

ഹും...

എന്തൊക്കെ സ്വപ്നങ്ങളായിരുന്നൂ..
സാക്ഷാൽ ഒറിജിനൽ ചാരന്മാരോടൊപ്പം നിന്ന് 
ഒരു ഡ്യൂപ്ലിക്കേറ്റ് ചാരൻ , അവന്റെ  ഫോട്ടൊകൾ അപ്ലോഡ് 
ചെയ്ത് ബ്ലോഗിലും , ഫേയ്സ് ബുക്കിലുമൊക്കെ പത്രാസ്സിൽ നിൽക്കാമെന്നുള്ള
മോഹങ്ങളാണ് ആ മുൻ ആകാശ തരുണി തകർത്ത് തരിപ്പണമാക്കി  കളഞ്ഞത് ..!


എന്തായാലും ഈ കഥാപാത്രത്തെ കുറിച്ച് കഴിഞ്ഞ നൂറ്റാണ്ടിലേയും , ഈ നൂറ്റാണ്ടിലേയുമടക്കം ലോകത്തിലെ ഒട്ടുമിക്ക മൂന്ന് തലമുറയിൽ പെട്ട ജനതക്കും അറിവുള്ള കാര്യങ്ങളാണെങ്കിലും , കഴിഞ്ഞ അഞ്ചുപതിറ്റാണ്ടുകളോളമായി , ഈ കഥാപാത്രത്തെ തൂലികയാൽ സൃഷ്ട്ടിച്ച എഴുത്തുകാരെനേക്കാൾ പ്രശസ്തി നേടിയ അദ്ദേഹത്തിന്റെ കഥകളിലെ ഇന്ന് ജീവിച്ചിരിക്കുന്ന നായക കഥാപാത്രങ്ങളെയടക്കം, വില്ലന്മാരായവരേയും , നായികമാരേയും, മറ്റ് അഭിനേതാക്കളേയും കൂടാതെ പിന്നണിയിൽ അണിനിരന്ന സവിധായകരടക്കം സകലമാന ക്രൂ-കളേയും  ആദരിക്കുകയും , ബഹുമാനിക്കുകയും ചെയ്യുന്ന ഒരു ചടങ്ങിൽ സന്നിഹിതനാകുവാൻ എനിക്കൊക്കെ കഴിയുക എന്നത് തീർച്ചയായും അഭിമാനിക്കാവുന്ന ഒരു സംഗതി തന്നെയായിരുന്നു....

 പ്രത്യേകിച്ച് ആയതിന് കാരണം ..
എന്റെയൊക്കെ ഒരു ഇഷ്ട്ട കഥാപാത്രവും , 
നായക സങ്കൽ‌പ്പവുമൊക്കെയായി ആ കഥകളിലെ  
നായകന് മനസ്സിൽ നല്ലൊരു  ഇടം കൊടുത്തതിനാലാകാം ..അല്ലേ.


1950 കളിലെ ബെസ്റ്റ് സെല്ലറായിരുന്ന , ‘ബ്രിട്ടീഷ് നേവൽ ഇന്റലിജൻസ് ഓഫീസ‘റായിരുന്ന ‘ഇയാൻ ഫ്ലെമിങ്ങിന്റെ (Ian Fleming)‘ ക്രൈം നോവലിലെ നായക കഥാപാത്രം , 1962 -ൽ സിനിമയിലൂടെ രംഗത്ത് വന്നപ്പോൾ , അന്ന് വരെ ഏതൊരു സിനിമക്കും കിട്ടാത്ത വരവേൽ‌പ്പായിരുന്നു യൂറോപ്പിലും , പിന്നീട് അമേരിക്കയിലും ആ ബോണ്ട് ചലചിത്രത്തിന് കൈവന്നത്...!  
പിന്നീട് പലതരം സാങ്കേതിക പ്രതിഭാസങ്ങളും അണിനിരത്തി 
‘റഷ്യാ വിത് ലൌവ്‘ (1963) , ‘ഗോൾഡ് ഫിൻഗർ‘ (1964) , ‘തണ്ടർ 
ബോൾ‘ (1965) തുടങ്ങിയ പടങ്ങൾ ഇറങ്ങിയപ്പോഴേക്കും ജെയിംസ് ബോണ്ട് 
ഫിലീമുകൾക്ക് ഉലകം മുഴുവൻ ആരാധകരായി കഴിഞ്ഞിരുന്നൂ...!

ഇതിനിടയിൽ ഇയാൻ ഫ്ലെമിങ്ങിന്റെ കഥകൾ മിക്കതും 
ലോകത്തിലെ പല ഭാഷകളിലേക്കും തർജ്ജമ ചെയ്യപ്പെട്ടു. 
1964 -ലെ അദ്ദേഹത്തിന്റെ മരണശേഷം , ‘ഫ്ലെമിങ്ങ് പബ്ലിക്കേഷൻസ് ‘
ആയിടെ തന്നെ ‘ജോൺ ഗാർഡനെറെ (John Gardner )‘ ഫ്ലെമിങ്ങിന്റെ പിൻ 
എഴുത്തുകാരനാക്കി മാറ്റി , പിന്നീട് ‘ക്രിസ്റ്റോഫർ വുഡ് (Christopher Wood )‘ , ‘റെയ്മണ്ട് 
ബെൻസൺ (Raymod Benson )‘ , ‘ജെഫെറി ഡേയ്‌വർ  (Jeffery Deaver )‘ എന്നീ പ്രശസ്തരായ എഴുത്തുകാർ കാലം തോറും ജെയിംസ്ബോണ്ട് കഥകളുടെ ഉപജ്ഞാതക്കളായി മാറികൊണ്ടിരുന്നൂ 

ബോണ്ട് സിനിമകളുടെ അന്നുമുതൽ ഇന്നുവരെയുള്ള നിർമ്മാണവും , 
സഹ സവിധാനവും , മറ്റു സാങ്കേതിക സവിധാനങ്ങളുമൊക്കെ നടത്തിക്കൊണ്ടിരിക്കുന്ന ‘ആൽബെർട്ട്-ആർ.ബ്രോക്കോളിയും ( Albert-R.Broccoli )‘ , ‘ഹാരി സാൾറ്റ്സ്വേയ് (Harry Saltzway )‘ യുടെയുമൊക്കെ  ഫേമിലികൾ തന്നെയാണ് , ഈ നിർമ്മാണ കമ്പനിയായ Eon - Productions-ന്റെ  അധിപന്മാർ .അവരിൽ കൂടെ വീണ്ടും  ബോണ്ട് കഥകൾ ആധുനിക പരിവേഷവുമായി പുന:ർജനിച്ചുകൊണ്ടിരിക്കുകയാണ്.

എന്തൊക്കെയായാലും ഞങ്ങളുടെ ചാരക്കമ്പനി ഒളിമ്പിക്സിന് ശേഷം , ഞങ്ങൾ ചാരന്മാർക്കും , ചാരത്തികൾക്കും ,  ‘50 കൊല്ലമെത്തിയ ജെയിംസ് ബോണ്ട് പ്രദർശനങ്ങൾ‘ കാണുവാൻ അനുവദിച്ചു തന്ന ഫ്രീ പാസുകളും, അവിടെയുണ്ടായിരുന്ന ‘ബോണ്ട്  മാർട്ടിനി ബാറിലെ‘ ഫ്രീ വൌച്ചറുകളും കിട്ടിയത് ഞങ്ങളൊക്കെ ശരിക്കും ആർമാദിക്കുവാൻ വേണ്ടി ഉപയോഗിച്ചുതീർത്തു എന്ന് പറഞ്ഞാൽ മതിയല്ലോ...

 ഇതുവരെയുണ്ടാക്കിയ ബോണ്ട് ചിത്രങ്ങളിലെ 
സ്പെഷ്ലലൈസിഡ് കാറുകളും, വാച്ചുകളും , തോക്കുകളും 
എന്ന് വേണ്ടാ സകലമാന കുണ്ടാമണ്ടികളുടേയും പ്രവർത്തനങ്ങളും,
മറ്റും വിശദമായി പരിചയപ്പെടുത്തുന്ന ഒരു ജയിംസ് ബോണ്ട് ത്രില്ലർ കണക്കെയുള്ള എക്സിബിഷൻ.,കണ്ടവരൊന്നും കഴിഞ്ഞ 50 കൊല്ലമായുണ്ടായിരുന്ന ബോണ്ട് സ്റ്റൈലുകളും , 
ഓരോ സിനിമാ നിർമ്മാണത്തിനായി ഉപയോഗിച്ചിരുന്ന സാങ്കേതിക പാടവങ്ങളുമൊക്കെ കണ്ട് കോരിത്തരിച്ചിട്ടായിരിക്കും സ്ഥലം വിട്ടിട്ടുണ്ടായിരിക്കുക .

ഒപ്പം തന്നെ അവരൊക്കെ ബോണ്ട് സിനിമകളിൽ കണ്ട് മറന്ന പല മുഖങ്ങളേയും
നേരിട്ട് കണ്ട് പരിചയപ്പെട്ട് , ഒന്നിച്ച് ഭക്ഷണം കഴിച്ചും , കുടിച്ചും , ഫോട്ടൊകളെടുത്തുമൊക്കെയുള്ള അനുഭൂതികളെല്ലാം അയവിറക്കിക്കൊണ്ടുമായിരിക്കുമെന്നത് തീർച്ചയായ ഒരു കാര്യം തന്നെയാണ്..!

പിന്നെ ഇതുവരെയുണ്ടായ എല്ലാ‍ ജെയിംസ് ബോണ്ട്
വിവരങ്ങളും ഉൾക്കൊള്ളിച്ച  ബ്ലൂ-റേയ് സീഡികളും അന്നുണ്ടായ
എക്സിബിഷനനിൽ  വെച്ച് പ്രകാശനം ചെയ്ത് , ജെയിംസ് ബോണ്ട്
പോസ്റ്ററുകൾക്കൊപ്പമോ, ബോണ്ടിനെ ആദരിക്കുവാൻ റോയൽ മെയിൽ
പുറത്തിറക്കിയ സ്റ്റാമ്പുകൾക്കൊപ്പമോ കാണികളായി എത്തിയവർക്ക് വിലകൊടുത്തും വാങ്ങിപ്പോകാമായിരുന്നു



കഴിഞ്ഞ 50 വർഷങ്ങളിൽ യൂ.കെയിലുണ്ടായിരുന്ന 
സെലിബിറിറ്റികളായ  ഫുഡ് ബോൾ / ക്രിക്കറ്റ് / ടെന്നീസ് 
താരങ്ങളാവട്ടെ അല്ലെങ്കിൽ സാക്ഷാൽ രാജാവോ, രാജ്ഞിയോ,
രാജകുമാരനോ ആകട്ടെ , ഇവരിൽ നിന്നെല്ലാം വിഭിന്നമായി ഭൂലോകത്തിന്റെ 
ഏത് കോണിൽ ചെന്നാലും അവിടെയുള്ള ജനങ്ങൾ , ഏറ്റവും കൂടുതൽ തിരിച്ചറിയുന്ന 
‘സീൻ കോണറി‘ മുതൽ ‘ഡാനിയേൽ ക്രേയ്ഗ്‘ വരെയുള്ള വിശ്വവിഖ്യാത നടന്മാരായ  ആറ് അഭിനേതാക്കളാൽ പിറവിയെടുത്ത  23 സിനിമകളിൽ കൂടിയും , വിവിധ ഭാഷകളിൽ സീരീസായി പ്രസിദ്ധീകരിച്ച  പുസ്തകങ്ങൾ  വഴിയും, ലോകജനതയുടെ നടുവിലേക്ക് ഇറങ്ങിവന്ന ...
ഒരു ചാര രാജാവ് തന്നെയാണ് ജെയിംസ് ബോണ്ട് എന്ന , 
ഇതിഹസ പുരുഷൻ എന്നാണ് നിശ്ചയമായും ഇവിടങ്ങളിലൊക്കെ പറയപ്പെടുന്നത് ...!

‘ഹാരി പോട്ടർ‘ പോലെ തന്നെ ലോക സിനിമാ 
ചരിത്രത്തിൽ ഇംഗ്ലണ്ടിന്റെ സീരീസായുള്ള ജെയിംസ് 
ബോണ്ട്  സിനിമകളാൽ  , ചരിത്രം കുറിച്ച ബ്രിട്ടന്റെ , ഈ 
സ്വന്തം ചാരൻ  , ഇന്ന് ഒരു അന്തർദ്ദേശീയ  ചാരനായി മാറിയെന്ന് 
പറഞ്ഞാൽ  അതിൽ ഒട്ടും അതിശയോക്തിയില്ല ..കേട്ടൊ.

ആദ്യമായി ഈസ്റ്റ്മേൻ കളറിലൂടേ 1962 ലെ പ്രഥമ ചിത്രമായ ‘ഡോ: നോ‘-  
മുതൽ , ഒന്നിനോടൊന്ന് മികച്ച വിധത്തിൽ , പ്രേഷകരെ മുഴുവൻ അതിശയിപ്പിക്കുന്ന,
ഹർഷ പുളകിതരാക്കുന്ന , ഭയാനകമായ രംഗ സജ്ജീകരണങ്ങളും , സാങ്കേതികമികവുകളും കോർത്തിണക്കി , അതാത് കാലഘട്ടങ്ങളിലെ ഏറ്റവും മേന്മയവകാശപ്പെടാവുന്ന  23 സൂപ്പർ ഹിറ്റ് സിനിമകളാണ് 2012 -ലെ ‘സ്കൈഫോൾ’ വരെ ഇതിന്റെ നിർമ്മാണ നിർവ്വഹകർ പൂർത്തീകരിച്ച് പുറത്തിറക്കിയിരിക്കുന്നത്.

ഇപ്പോളിതാ രണ്ട് പുതിയ ബോണ്ട് മൂവികൾക്കുകൂടിയുള്ള 
കരാർ പണികൾ ഈ കമ്പനി ഏർപ്പാടാക്കി കഴിഞ്ഞിരിക്കുകയാണ്..

അതാണ് പറയുന്നത് ...
നമ്മളൊക്കെ മണ്ണടിഞ്ഞ് പോയാലും,
ഈ ബോണ്ടേട്ടൻ  എന്നും ഒരു അന്തർ 
ദേശീയ നിത്യഹരിത നായകനായി ജീവിച്ചുകൊണ്ടിക്കും..
ഒരു ചിരജ്ഞീവിയായി...  , സിനിമയും ഫിക് ഷനുമുള്ള കാലത്തോളം ...!



( വിക്കിപീഡിയയിൽ നിന്നും കടമെടുത്തവ )